اپوزیشن اتحاد کی میٹنگ میں18پارٹیاں شامل ہونگی

اپوزیشن اتحاد کی میٹنگ میں18پارٹیاں شامل ہونگی
پٹنہ (ت ن س)جنتادَل یو کے قومی صدر راجیو رنجن سنگھ عر ف للن کہاہے کہ 23جون کو پٹنہ میں ہونےوالی اپوزیشن اتحا د کی میٹنگ تاریخ ساز  اور قومی سطح پر اپوزیشن اتحاد کو مضبوط بنانے کی سمت میں فیصلہ کن ثابت ہوگی۔ انہوں نے کہاکہ وزیراعلیٰ نتیش کمار کی یہ پہل کامیاب ہوگی اور بہارکی راجدھانی پٹنہ سے ایک بڑا پیغام جائے گا۔ جنتادَ ل یو صدردفترمیں ملن تقریب سے خطاب کرتے ہوئے للن سنگھ نےبتایاکہ 23 جون کو پٹنہ میں ہونے والی اپوزیشن اتحاد کی میٹنگ میں 18 پارٹیاں حصہ لیں گی۔للن سنگھ نے یہ بھی کہا کہ اپوزیشن اتحاد سے وزیر اعظم کون بنے گا؟ ابھی نہیں بتایا جائے گا۔ جب الیکشن ہوں گے اور اپوزیشن اتحاد جیتے گا۔ اس کے بعد وزیراعظم کا اعلان کیا جائے گا۔للن سنگھ نے بی جے پی ہدف تنقید بناتے ہوئے کہاکہ اس وقت ملک میں ایمرجنسی کی صورتحال ہے۔ 1974 کی ایمرجنسی ایک اعلان کردہ ایمرجنسی تھی لیکن آج ایک غیر اعلانیہ ایمرجنسی ہے۔انہوں نے کہاکہ ملک میں ایمرجنسی جیسی صورتحال ہے۔انہوں نےکہاکہ جب جمہوریت میں اظہار رائے کی آزادی ختم ہو جائے تو صورتحال بدلنی چاہیے۔ آج جمہوریت انتہائی خطرناک حالت میں ہے۔ بی جے پی تمام پرانی تاریخ بدل رہی ہے۔ مہاتما گاندھی کوفراموش کرنے کی کوشش ہورہی ہے۔ بھیم راؤ امبیڈکر کے اصولوں کونظراندازکیاجارہاہے۔جن نائک کرپوری ٹھاکر کی جدوجہد کو بھول رہے ہیں۔للن سنگھ نےالزام لگاتے ہوئے کہاکہ بی جے پی ریزرویشن مخالف ہے۔ کرپوری ٹھاکر نے 1977 میں ریزرویشن نافذ کیا، پھر بھارتیہ جنتا پارٹی کے لوگوں نے اس حکومت کو گرا دیا۔بھارتیہ جنتا پارٹی کی حکومت نے تمام آئینی اداروں پر کنٹرول کر لیا ہے۔ میڈیا کی آزادی ختم ہو چکی ہے۔راہل گاندھی کی رکنیت جاتی ہے تو 5 دن تک بحث چلتی ہے۔ یہ لوگ مذہبی جنون پھیلا رہے ہیں۔ للن سنگھ نے ٹی وی اینکر کی نقل کرتے ہوئے کہا کہ آپ دیکھ رہے ہیں کہ بھگوان کی توہین کی گئی ہے۔ مذہب کی توہین کی گئی ہے۔ وہ دن بھر شور مچاتے ہوئے مذہبی جنون پھیلاتے ہیں۔ جے ڈی یو لیڈر نے کہا کہ ملک نجکاری کی طرف جا رہا ہے۔ ملک کے مسائل پر بات نہیں کریں گے، مذہب کے نام پر معاشرے میںنفرت پیدا کر رہے ہیں۔ ان کے نام پر مذہبی جذبات کو ہوا دے کر ووٹ حاصل کرنے کی سازش کی جارہی ہے۔ عوام سب کچھ دیکھ رہے ہیں اور وقت پر جواب دیںگے۔بی جے پی کرناٹک میں جواب دیا گیا اور آنے والے وقت میں بھی اس کا مناسب جواب ملے گا۔23 جون کو 18 اپوزیشن پارٹیوں کے لوگ پٹنہ آ رہے ہیں۔ للن سنگھ نے کہاکہ اپوزیشن اتحاد کی میٹنگ میں محبوب مفتی اور فاروق عبداللہ جیسے لیڈر بھی شریک ہونگے۔ انہوں نے کہاکہ وزیراعلیٰ نتیش کا مقصد صاف ہے کہ اپوزیشن اتحاد کو مضبوط بناکر ملک کو بی جے پی سے نجات دلاناہے۔ وزیراعظم کا انتخاب اتفاق رائے کی بنیاد پر کیاجائے گا۔ انہوں نے کہاکہ بی جے پی اس سلسلے میں گمراہ کرکے اپوزیشن اتحاد کو کمزورکرنے کی کوشش کرناچاہتی ہے۔ پارٹی لیڈروں اور کارکنوں کے علاوہ موجودہ حالات سے بیزار عوام کو ہوشیاررہناہوگا۔ اپوزیشن اتحاد مستحکم ہے اور صحیح سمت میں آگے بڑھ رہاہے۔