مودی میں ملک کو متحد اور برقرار رکھنے کی صلاحیت نہیں ۔منوج جھا

پٹنہ: آر جے ڈی کے راجیہ سبھا رکن منوج جھا نے جمعرات کو وزیر اعظم نریندر مودی پر تنقید کرتے ہوئے کہا کہ ایک دن وہ دعویٰ کریں گے کہ ان کی وجہ سے سورج مشرق سے طلوع ہوتا ہے۔ منوج جھا نے میڈیا سے بات کرتے ہوئے کہا ’’ایک دن آئے گا جب پی ایم مودی کہہ سکیں گے کہ سورج ان کی وجہ سے مشرق سے نکلتا ہے ورنہ سورج مغرب سے طلوع ہوتا!
انہوں نے کہا کہ مودی میں ملک کو متحد اور برقرار رکھنے کی صلاحیت نہیں ہے۔ جھا نے کہا ’’منی پور جل رہا ہے اور انہوں نے اس کے بارے میں ایک لفظ بھی نہیں کہا۔‘‘ انہوں نے کہا کہ یہ خدا کا کرم ہے کہ مودی جھنڈے کے ساتھ سرنگ تک نہیں پہنچے جہاں سے کارکنوں کو بچایا جا رہا تھا۔پانچ ریاستوں کے انتخابی نتائج پر منوج جھا نے کہا کہ نتائج کا اعلان ہونے تک ان کے بارے میں کچھ نہیں کہا جا سکتا۔ انہوں نے کہا، ’’میں امت شاہ نہیں ہوں جو ای وی ایم کے بارے میں پیشگی معلومات حاصل کر سکوں۔ میں صرف اتنا جانتا ہوں کہ وہ الیکشن ہار جائیں گے۔‘‘
بہار میں ‘جنگل راج کے الزام پر جھا نے بی جے پی لیڈروں سے پوچھا کہ وہ منی پور اور اتر پردیش کے بارے میں بات کیوں نہیں کر رہے۔ جھا نے کہا ’’میں سوچ رہا ہوں کہ سمراٹ چودھری منی پور کے بارے میں کچھ کہیں گے یا نہیں۔ جب بھی کوئی جرم ہوتا ہے تو بہار پولیس مجرموں کے خلاف فوری کارروائی کرتی ہے۔ بی جے پی ریاستی حکومت کی ہر پالیسی اور قدم پر اعتراض کر رہی ہے، لیکن اپوزیشن کی ایسی پالیسیاں ریاست کے مفاد میں نہیں ہیں۔